పిట్టల్లా రాలిన డ్రోన్లు... ఫ్లోరిడా షోలో ప్రమాదం..!
పిట్టల్లా రాలిన డ్రోన్లు... ఫ్లోరిడా షోలో ప్రమాదం..! 8 h ago
క్రిస్మస్ వేడుకల సందర్భంగా నిర్వహించిన ఓ వేడుకలో ఊహించని ప్రమాదం జరిగింది. వేడుకల్లో భాగంగా నిర్వహించిన ప్రదర్శనలో డ్రోన్లు పరస్పరం ఢీకొన్న ఘటన యుఎస్ లోని ఫ్లోరిడాలో జరిగింది. అధికారులు తెలిపిన వివరాల ప్రకారం క్రిస్మస్ వేడుకల్లో భాగంగా ఫ్లోరిడాలో ఇయోలా సరస్సుపై పలు కార్యక్రమాలు ఏర్పాటు చేశారు. ఏరియల్ లైట్ షోలో భాగంగా డ్రోన్ల ప్రదర్శన కూడా ఏర్పాటు చేశారు. వాటిని చూడడానికి పెద్ద ఎత్తున జనాలు తరలివచ్చారు. ప్రదర్శన జరుగుతున్న సమయంలో అనుకోకుండా గాలిలో ఎగురుతున్న వందల కొద్దీ డ్రోన్లు పరస్పరం ఢీకొట్టుకున్నాయి. అతివేగంగా వచ్చి కార్యక్రమాన్ని వీక్షిస్తున్న ప్రేక్షకులపై పడటంతో ఏడేళ్ల బాలుడుతో సహా పలువురు గాయపడ్డారు. గాయపడిన పిల్లాడి పరిస్థితి విషమంగా ఉన్నట్లు స్థానిక సంస్థలు తెలిపాయి.
డ్రోన్లు కూలిపోతున్న దృశ్యాన్ని ఓ నెటిజన్ సోషల్ మీడియాలో పోస్ట్ చేయడం వలన ఈ దృశ్యం వైరల్ గా మారింది. ఓర్లాండ్ సిటీ భాగస్వామ్యంతో స్కై ఎలిమెంట్ సంస్థ రోడ్ల ప్రదర్శనను ఏర్పాటు చేసినట్లు అధికారులు వివరించారు. ఈ కార్యక్రమానికి ఫెడరల్ ఏవియేషన్ అడ్మినిస్ట్రేషన్ అనుమతించిందని తెలిపారు. ప్రమాదానికి గల కారణాలను తెలుసుకునే కోణంలో దర్యాప్తు చేస్తున్నామని పోలీసులు వెల్లడించారు.
